NOna tili va adabiyot

«Molxona» asari — testlar

50 ta savol. Javoblarni belgilang va oxirida «Testni yakunlash» tugmasini bosing — xatolaringiz to‘g‘ri javobi bilan ko‘rsatiladi.

📝 50 ta savol✅ Javoblari bilan⏱ Vaqt cheklanmagan

JORJ ORUELL

"MOLXONA" (Animal Farm, 1945)

Muallif va asar haqida

Jorj Oruell (asl ismi Erik Artur Bler, 1903–1950) — ingliz yozuvchisi va publitsisti, "1984" romanining muallifi. "Molxona" 1945-yilda nashr etilgan va muallif unga "ertak" deb nom bergan.

Janri: allegorik-satirik qissa (masal-ertak). Hayvonlar obrazlari orqali jamiyat va hokimiyat tanqid qilinadi. Asarda 1917-yilgi Rus inqilobi va undan keyingi Stalin davri tarixi ramziy tasvirlangan.

Asosiy g'oya: eng yorqin va adolatli g'oya ham nazoratsiz hokimiyat, targ'ibot va qo'rquv orqali zulmga aylanishi mumkin. Mustaqil fikr, savodxonlik va xotira bo'lmasa, "tenglik" shiori yangi tengsizlikni yashirishga xizmat qiladi.

Asosiy ramzlar: ferma — davlat; cho'chqalar — yangi hukmron tabaqa; itlar — jazo tizimi; Yetti amr — inqilob qonunlari; shamol tegirmoni — bajarilmas va'dalar; "Angliya hayvonlari" — inqilobiy orzu.

Qahramonlar tavsifi

Qahramon Tavsifi va asardagi o'rni
Keksa Mayor Dono, keksa to'ng'iz. O'limidan oldin tush ko'rib, hayvonlarni inson zulmiga qarshi qo'zg'olonga chaqiradi va "Angliya hayvonlari" qo'shig'ini o'rgatadi. Inqilob g'oyasining otasi.
Napoleon Bahaybat, shiddatli to'ng'iz. Kam gapiradi, ammo o'z bilganini qiladi. Yashirincha kuchuklarni tarbiyalab, ular yordamida Snoubolni quvadi va yakka hukmdorga — "dohiy"ga aylanadi.
Snoubol Dilkash, notiq, yangilikka o'ch cho'chqa. Sigirxona jangining qahramoni, shamol tegirmoni loyihasi muallifi. Napoleon uni quvgach, barcha baxtsizliklarda ayblanadigan "xoin"ga aylantiriladi.
Qichqiroq (Skuiylir) Kichkina, semiz, so'zamol cho'chqa — Napoleonning targ'ibotchisi. "Qorani oq deb ishontira oladi": raqamlar, yolg'on va qo'rquv bilan har qanday qarorni oqlaydi.
Boksyor Fermadagi eng kuchli va mehnatkash ot. Aqli o'tkir emas, ammo halol va fidoyi. Shiorlari: "Men ko'proq ishlayman!" va "Napoleon har doim haq". Kuchdan qolgach, qassobga sotib yuboriladi.
Klover Mehribon, onalarcha g'amxo'r biya. O'zgarishlarni his qiladi, ammo ularni so'z bilan ifoda eta olmaydi.
Benjamin Fermadagi eng keksa, kamgap va tund eshak. Hamma narsani tushunadi, o'qiy oladi, lekin aralashmaydi. Faqat Boksyor olib ketilayotganda haqiqatni baqirib aytadi — ammo kech.
Molli Jonsning aravasiga qo'shiladigan chiroyli, ammo yengiltak oq ot. Qand va lentalarni erkinlikdan afzal ko'radi, oxiri qochib, odamlar xizmatiga ketadi.
Mozus (Muso) Jonsning qo'lga o'rgatilgan qarg'asi. Hayvonlarga o'limdan keyingi jannatmonand "Shakartog'" haqida ertak so'zlaydi.
Myuriel Oq echki. Biroz o'qiy oladi, devordagi amrlarni boshqalarga o'qib beradi.
Minimus Shoir cho'chqa, "O'rtoq Napoleon" madhiyasining muallifi.
Itlar va qo'ylar Itlar — Napoleonning qo'riqchisi va jallodi. Qo'ylar — o'ylamay shior takrorlovchi "olomon": "To'rt oyoq — yaxshi, ikki oyoq — yomon!"
Jons Fermaning ichkilikboz, beparvo egasi; hayvonlarni och qoldirgani uchun quviladi.
Uimper, Pilkington, Frederik Odamlar dunyosi: Uimper — cho'chqalarning savdo vakili; Pilkington va Frederik — qo'shni ferma egalari.

Voqealar ketma-ketligi

  1. Mayorning nutqi. Keksa Mayor hayvonlarni yig'ib, inson ularning yagona dushmani ekanini aytadi va "Angliya hayvonlari" qo'shig'ini o'rgatadi. Uch kundan so'ng vafot etadi.

  2. Qo'zg'olon. Cho'chqalar Mayor g'oyalarini "Hayvonizm" ta'limotiga aylantiradi. Jons hayvonlarni och qoldiradi — ular isyon ko'tarib, uni quvib chiqaradi. "Qo'rg'oncha" fermasi "Hayvonobod" deb ataladi, devorga Yetti amr yoziladi (eng muhimi: "Barcha hayvonlar teng").

  3. Birinchi imtiyozlar. Hosil yig'imi muvaffaqiyatli o'tadi. Ammo sut va olmalar faqat cho'chqalarga beriladi — Qichqiroq buni "aqliy mehnat" bilan oqlaydi. Napoleon kuchuklarni yashirincha olib ketadi.

  4. Sigirxona jangi. Jons fermani qaytarib olishga urinadi. Snoubol va Boksyor boshchiligida hayvonlar g'alaba qozonadi.

  5. Snoubolning quvilishi. Molli fermadan qochadi. Snoubol shamol tegirmoni qurishni taklif qiladi. Napoleon katta bo'lgan itlarini qo'yib, uni quvib chiqaradi, majlislarni bekor qiladi — qarorlarni endi cho'chqalar qabul qiladi.

  6. Tegirmon va yolg'on. Napoleon tegirmonni "o'z g'oyasi" deb e'lon qiladi. Hayvonlar og'ir mehnat qiladi, cho'chqalar odamlar bilan savdo boshlab, Jonsning uyiga, karavotlariga ko'chadi. Bo'ron tegirmonni buzadi — ayb Snoubolga yuklanadi.

  7. Qo'rquv davri. Qahraton qish, ochlik; tashqi dunyoni aldash uchun omborlarga qum solinadi. Napoleon "aybini bo'yniga olgan" hayvonlarni itlarga qatl ettiradi. "Angliya hayvonlari" taqiqlanadi, amrlar yashirincha o'zgartiriladi.

  8. Shamol tegirmoni jangi. Frederik soxta pul bilan yog'och sotib oladi, so'ng fermaga hujum qilib, tegirmonni portlatib yuboradi. Hayvonlar katta qurbonlar bilan g'alaba qiladi.

  9. Boksyor fojiasi. Holdan toygan Boksyor yiqilib qoladi. Napoleon uni otlarni so'yuvchiga sotib yuboradi; Qichqiroq esa "u kasalxonada, Napoleonni duo qilib o'ldi" deb aldaydi.

  10. Yakun. Yillar o'tadi, inqilobni eslaydiganlar kamayadi. Cho'chqalar ikki oyoqda yurib, qamchi ko'tarib chiqadi. Yetti amr o'rnida bittasi qoladi: "Barcha hayvonlar teng, biroq ayrim hayvonlar boshqalaridan ko'proq teng". Ferma yana "Qo'rg'oncha" deb ataladi. Derazadan qaragan hayvonlar ziyofatdagi cho'chqalar bilan odamlarni bir-biridan ajrata olmaydi.

Yetti amr va ularning o'zgarishi

  1. Ikki oyoqda yuruvchi — dushman. → Oxirida cho'chqalarning o'zi ikki oyoqda yuradi.

  2. To'rt oyoqli yoki qanotli — do'st. → Cho'chqalar odamlar bilan do'stlashadi.

  3. Hech bir hayvon kiyim kiymaydi. → Cho'chqalar Jonsning kiyimlarini kiyadi.

  4. Hech bir hayvon karavotda uxlamaydi. → "...choyshab bilan uxlamaydi" deb o'zgartiriladi.

  5. Hech bir hayvon spirtli ichimlik ichmaydi. → "...me'yoridan ortiq ichmaydi".

  6. Hech bir hayvon boshqa hayvonni o'ldirmaydi. → "...sababsiz o'ldirmaydi" (qatllardan keyin).

  7. Barcha hayvonlar teng. → "...biroq ayrim hayvonlar boshqalaridan ko'proq teng".

Xulosa

Asar boshida hayvonlar inson zulmidan qutulish uchun kurashadi, oxirida esa ular ustidan xuddi o'sha insonlarga o'xshab qolgan cho'chqalar hukmronlik qiladi. Asarning asosiy kinoyasi ana shunda: ozodlik va'da qilgan inqilob eski zulmning yangi ko'rinishiga aylanadi. Oruell o'quvchini ogohlantiradi: hokimiyatni nazorat qilish, tarixni yodda saqlash va mustaqil fikrlash har qanday jamiyatning himoyasidir.

«Molxona» bo‘yicha testlar

Ma’lumotlaringiz — ism (natija o‘qituvchiga borishi uchun)
1."Molxona" asari janriga ko'ra qanday asar?
2.O'n ikki yoshga kirgan, semizligidan qorni osilib ketgan, o'zini dono hisoblaydigan va hayvonlarga muruvvatli ekanini ko'rsatishni yoqtiradigan qahramon kim?
3.Hayvonlar jamiyati g'oyasining asoschisi, o'limi oldidan "ozod hayvonlar jamiyati"ni qurishni vasiyat qilgan qahramon kim?
4.Asarda hayvonlarning isyon ko'tarishiga bevosita zamin yaratgan holat qaysi?
5."Qancha ko'p ishlasangiz ham qorningiz hech qachon ovqatga to'ymaydi... Biz hayotning issiq-sovug'ini boshimizdan o'tkazib, so'ngra qarib-chirib o'z ajalimiz bilan o'lmaymiz." Bu fikrlar kimga tegishli?
6."Odam – o'zi hech narsa ishlab chiqarmay, hammasini hazm qiladigan yagona maxluqdir." Bu gaplarni kim aytgan?
7."Boksyor, kuchingiz ketib munkillab qolganingizda Jons sizni arzimagan pul evaziga konserva tayyorlaydigan korxonaga sotib yuboradi." Bu so'zlar kimga tegishli?
8.Mayorning nutqi hayvonlarga eng avvalo qanday g'oyani singdiradi?
9.Keksa Mayor qaysi xususiyatlarni insonning yovuz odatlari deb ataydi? 1) uylarda yashash; 2) karavotda uxlash; 3) spirtli ichimlik ichish; 4) tamaki chekish va pul ishlatish; 5) savdo bilan shug'ullanish
10.Keksa Mayor hayvonlarga yodlatgan qo'shiq qanday nomlanadi?
11.Qo'shiqni bir zumda yodlab olib, qayta-qayta kuylagan eng aqlli hayvonlar kimlar edi?
12."Molxona" asari haqidagi to'g'ri fikrni aniqlang.
13.Juda bahaybat, kuchli, shiddatli va qo'rqmas; o'z ishini yaxshi bilgani uchun nima xohlasa, unga erishadigan to'ng'iz kim?
14.Dilkash, hayvonlar bilan tez chiqishib ketadigan, fikri teran va yangiliklar yaratishga o'ch cho'chqa kim?
15.Kichkina, ammo semiz, ko'zlari yulduzdek yonadigan, harakatlari chaqqon va ovozi o'tkir cho'chqa kim?
16.Hayvonlar kimni "qorani oq deb ishontira oladi" deb aytishar edi?
17.Yoshi o'tgan bo'lsa-da, nihoyatda kelishgan, bolalariga mehribon, to'rt marta qulunlaganidan keyin ham qomati ko'rkini yo'qotmagan biya kim?
18.Yuziga anqovlik tusini beruvchi uzun yolli, aqli unchalik o'tkir bo'lmasa-da, irodasi mustahkam va fermada hammaning hurmatini qozongan hayvon kim?
19.Fermadagi eng keksa, kamgap, hamisha nimadandir achchiqlanib yuradigan, ko'p narsani bilsa-da, hech narsaga aralashmaydigan hayvon kim?
20.Jonsning aravasiga qo'shiladigan, chiroyli, lekin fahm-farosati kamroq hayvon kim?
21.Qo'zg'olonga tayyorgarlik davomida eng ahmoqona savollar kim tomonidan berilar edi?
22.Qo'zg'olonga tayyorgarlik davrida cho'chqalar uchun eng murakkab ish nima edi?
23.Qo'zg'olonni tashkil qilish va uning mohiyatini barcha hayvonlarga yetkazish vazifasi kimlarning zimmasiga yuklatildi?
24.Isyondan keyin fermadagi dastlabki o'zgarishlar qaysi maqsadga xizmat qiladi?
25.Qaysi hayvon "Qo'rg'oncha" (Manor ferma) yozuvini "Hayvonobod" (Hayvonlar fermasi) deb yozib qo'ydi?
26.Hayvonlar bayrog'idagi yashil rang nimani bildirar edi?
27.Cho'chqalarning "hamma teng" deyishlariga qaramay, bu qoidani buzishlari birinchi bo'lib nimada ko'rinadi?
28."Barcha hayvonlar teng" g'oyasining buzilishi qaysi jarayonda yaqqol ko'rinadi?
29."Molxona" asari voqealari haqidagi XATO fikrni aniqlang.
30.Mollining fermani tark etishi nimani anglatadi?
31.Napoleon va Snoubol o'rtasidagi asosiy ziddiyat nimada namoyon bo'ladi?
32.Snoubolning qarashlari qaysi javobda to'g'ri talqin etilgan?
33.Snoubolning shamol tegirmoni loyihasi qanday maqsadni ko'zlaydi?
34.Snoubol haqidagi XATO javobni belgilang.
35.Napoleonning kuchuklarni yashirincha tarbiyalashi keyinchalik nimaga olib keladi?
36.Snoubol fermadan quvilgach, Napoleon boshqaruvni qanday o'zgartiradi?
37.Qichqiroq (Skuiylir)ning asosiy vazifasi nimadan iborat?
38.Napoleon shamol tegirmoni vayron bo'lganida aybni kimga yuklaydi?
39.Qichqiroqning Snoubol haqidagi gaplari vaqt o'tishi bilan qanday o'zgaradi?
40.Sigirxona jangi tarixini qayta talqin qilishdan Napoleon qanday foyda ko'radi?
41.Fermadagi oziq-ovqat ko'pligi haqida tashqi kuzatuvchini aldash uchun qanday usul qo'llanadi?
42.Uimper bilan munosabatlar cho'chqalar siyosatida nimani ko'rsatadi?
43."O'rtoq Napoleon" she'rining muallifi kim?
44.Boksyorning "Men ko'proq va yaxshiroq ishlashim kerak" degan shiori uning qaysi xususiyatini ochadi?
45.Boksyorni olib ketayotgan aravadagi yozuv hayvonlarda qanday shubha uyg'otadi?
46.Qichqiroq Boksyorning so'nggi kunlari haqida gapirganda nima qilishga urinadi?
47.Cho'chqalarning ikki oyoqda yura boshlashi qanday ramziy ma'noga ega?
48."Barcha hayvonlar tengdirlar. Biroq ayrim hayvonlar boshqalaridan ko'proq tengdirlar." Bu tamoyil qachon paydo bo'ladi?
49.Asar oxirida tashqaridagi hayvonlar cho'chqalar va insonlarni ajrata olmay qolishi nimani ifodalaydi?
50.Asardagi eng muhim kinoya qaysi holatda namoyon bo'ladi?